ويرضع اللبنات
يا أرض جواكى عصير أخضر
نغم أخضر
بتسكته الزعابيب
يا طوبه .. يا أمشير .. يا برمهات
شفتوش حبيبتى بالجبين قمحى
والشعر خيلى
والقليب حمامات
الفلاحين زيي بيستنوها
وبالأماره ..
وحياة .. ميتكم
وزعابيبكم .. وخضرتكم
كانت معانا الموسم اللى فات
يا طوبه .. يا أمشير .. يا برمهات
والفلاحين ألوفات
قلعو لك الجلاليب
غرزوا عروقهم فى ضلعك
شدوكى من موسم موات
كتبوا عليكى حلال
المهر كان بالتمام
قمر تمام لما الهلال
وجلد داب على الزنود الرجال
كرهوا بيوتهم لجل ما توديهم
واتجوزوكى حلال
أصبحت شبه زمرده خضره
أصبحت زى الكلمه فى الموال
بتنخلق م القلب للشفه
تنقال ولا تنطال
